الرجال افعال =================
يقولون الرجل يوم الملاقى والرجال افعال^^^وقيل الريح ماتسفي سوى من فلت زمامه
وان الهم لاعم يشيله لا ولاخال^^^ومن لا شال صكات الليالي مانطح هامه
وانا ماني تبع لا لا ولاتابع ولا قوّال^^^ولكني بشر غير البشر لي نفس قوّامه
كسبت من المراجل ماكسبت ولاكسبت رجال^^^وكل له مع الدنيا عبر والوقت قدامه
تعزويت بظلال ولادريت ان الرجال ظلال^^^واني آخر الصفوه عطى والناس لمامه
فلي حزم ولي جزم ولي عزم ولي اقبال^^^ولي كف على هدى النبي للشر لطامه
ولي سلوى على البلوى ولاتلوي لي الآمال^^^ولي نفس على رد الردي ماهيب سوامه
ولي شيمه ولي ديمه ولي قيمه ولي اجلال^^^ولاني قاصر قمه ولاني قاصر قامه
خلقني الله لاصناف الصروف وللصروف اشكال^^^والا مني قضبت اقضب زمام الامر وخطامه
اعرف الرمح والحد الرهيف وهزة الفنجال^^^واعرف الناس مسلم قلب وكافر ظاهر اسلامه
واعرف اني كبرت من الشقى ومزاحم الاحمال^^^وحزن يرتحل بين الضلوع وينصب خيامه
واعرف اني كبرت من الشقى والا العمر لازال^^^شبابي وش بقى به راح ياوجدي على ايامه
واعرف وقل من يعرف بأن الضحكه ماتنشال^^^وان الريح غير الريح وان النفس هدامه
واعرف ان الزمن ند الاماني والاماني قلال^^^وعلى قل الفرح يرقى الفقر وتذل احلامه
لذا كانت بداياتي نهاياتي سجن واغلال^^^وصرت لكل بلايا هالزمان المر رزنامه
وبدلت الوصال بعاد وبدلت البعاد وصال^^^واكرمت العدو حتى العدو استوجب اكرامه
رزح قلبي تحت طغي الزمن والجور والاذلال^^^عسى الله لايسامح خافق اللي خافقي لامه
حثيت الفرح من قل الفرح والناس تحثي رمال^^^وصنت الليل من قل الضوى لي عمر ماانامه
ومع ذا يالزمان اللي عوجني لين حظي مال^^^واخلف خافقي مثل الطفل والكل ظلامه
بسامح مثلما قلبي يسامح فـ اسوأ الاحوال^^^فلا تثريب وقلبي للجمر برضاه وبارغامه
عساني القى بوجداني بقايا واركب الترحال^^^واكون اول بشر يزرع ضماه ويشرب آلامه
================================
وصلت لي عبر البريد وعجبتني وحبيت اشارك فيها
الرجال افعال 
النمط الأُحادي
